2018年3月8日

建制派最捱得

據報行會成員、科技園主席、前廉政專員、前教署高層、董建華愛將、范鴻齡個妹的羅范椒芬,日前回應有指年輕人未能從預算案受惠,說了一句「捱吓啦後生仔」。筆者不能同意更多。香港中環核心價值就是成功=有錢=努力=肯捱,肯捱就會做成功人士,不肯捱就會做失敗人士,所以羅范椒芬此言是袋錢落年輕人袋。

以羅范本人為例,她在官場浮沉多年,捱過不少次,如教師自殺風波、教院風波、梁特偷步改組政府風波等等,全部以失敗收場,堪稱香港AO史上最失敗人士之一。但就是因為她肯捱,夠勤力,所以獲得香港政界黑幕、亂港四人幫之一的董建華賞識,每次她有難都出手相救,立即幫她搵份新工,而且每份筍過一份。所以羅范證明,識得泊碼頭識老細......不對,是肯捱,是幾重要。

董建華本人當然也是肯捱的典範。眾所周知他非常勤力,據說做特首時經常返工N個小時。他也是在政商界浮沉多次。無論是搞到老豆留低間公司就黎破產,還是搞到英國人留低的香港從高峰跌至谷底,他都是肯捱,夠勤力,所以獲得「阿爺」打救,可說是「如果沒有中央出手你早就完蛋了」的始作俑者。所以董生證明,識得投胎做二世祖......不對,是肯捱,是幾重要。

親中派這麼多有錢人,也是因為他們肯捱。例如現在北京開兩會,翻開人大政協名單,除了董浩雲個仔,還有李嘉誠個仔、李兆基個仔、李國寶個仔、郭得勝個仔、呂志和個仔、霍英東個仔、唐翔千個仔、田元灝個仔、陳有慶個仔、李東海個仔、王華生個仔、黃保欣個仔、邱德根個仔、林百欣個仔、曾憲梓個仔、何英傑(何伯)個孫、劉皇發個仔、楊孫西個女、何鴻燊個仔(澳門)、崔世安阿哥(澳門)......當然少不了「成功需苦幹」的蔡志明個仔等等。筆者相信這些後生仔也是因為肯捱,才獲國家賞識,出任人大政協。

話時話,早幾日FB看到九西民建聯候選人阿邊個有錢仔和蔣麗芸一起拉票的片段,只見他又被「秋姐」疾住兼串爆。捱吓啦後生仔,唔湊住啲大佬大姐同中聯辦......不對,是唔努力拉票和服務街坊,點有咁易當選丫。

轉個頭,FB又彈出一條某新聞台的節目,訪問街邊拾紙皮阿婆幾辛苦搵錢。佢肯定係後生時唔肯捱啦,否則點會搞成咁。不過雖然係咎由自取,筆者都相信香港咁多市民生活艱難,都係源於經濟差,比唔上深圳。例如,香港政府年度盈餘得千幾億,政府儲備得一萬億,你話經濟幾差。之所以經濟咁差,都係因為泛民拉布囉,阻住起基建工程和科學園,冇運用好一帶一路和大灣區機遇。筆者相信只要泛民停止拉布,貧窮問題、老人問題、醫療問題、房屋問題,立即迎刃而解。至於有人要求派糖派錢增加福利呢,養懶人架,搞到啲人唔捱得架,啲人唔肯捱班親中派二世祖仲可以剝削邊個......不對,最後一句打錯的,唔好理呀下。

沒有留言:

張貼留言